Wilaya Ngorongoro ina utajiri mkubwa wa rasilimali ikiwemo misitu ya asili, wanyamapori na vivutio vya utalii. Aidha, kulingana na sheria ya Wanyamapori namba 12 ya mwaka 1974 na sheria namba 5 ya mwaka 2009 sehemu kubwa ya Wilaya Ngorongoro imehifadhiwa kwa mchanganuo ufuatao;-
Eneo lote la Tarafa ya Loliondo na sehemu ya Tarafa ya Sale linatambulika kama Pori Tengefu la Loliondo lenye ukubwa wa kilomita za mraba 4000
Eneo kubwa la Tarafa ya Sale lipo chini ya Pori Tengefu la Ziwa Natron lenye ukubwa wa kilomita za mraba 1744
Eneo lote la Tarafa ya Ngorongoro lenye ukubwa wa kilomita za mraba 8292 lipo chini ya Mamlaka ya Hifadhi ya Ngorongoro kwa sheria iliyoanzisha Mamlaka ya Hifadhi ya Ngorongoro ya mwaka 1959/ 2002.
Kutokana na raslimali na vivutio hivi, Wilaya inategemea kupata mapato yake kwa zaidi ya 80% kutoka kwenye sekta hii ya utalii. Shughuli za kitalii ambazo hufanyika ni pamoja na utalii wa picha na uwindaji wa kitalii. Utalii hufanyika katika vitalu vya Loliondo (Pori Tengefu la Loliondo), Ziwa Natron na Mamlaka ya Hifadhi ya Ngorongoro. Makampuni makubwa yanayoendesha shughuli za utalii wa picha ni pamoja na AndBeyond company, Buffalo luxury Camp, Serena hotel, Sopa lodges na Ndutu Safari Lodge kwa kutaja chache. Pia makampuni yanayofanya uwindaji wa kitalii ni pamoja na OBC (Ortelo Business Corporation Ltd) na Michel Mantheakis Safaris Ltd (Kitalu cha Ziwa Natron Kusini Magharibi).
