Ziara ya Mheshimiwa Januari Makamba (Mb) Waziri wa Nchi Ofisi ya Makamu wa Rais - Muungano na Mazingira katika Wilaya Ngorongoro

Posted on: March 30th, 2017

Ziara ya Mheshimiwa Januari Makamba (Mb) Waziri wa Nchi Ofisi ya Makamu wa Rais - Muungano na Mazingira katika Wilaya Ngorongoro.

Waziri wa Nchi Ofisi ya Makamu wa Rais – Muungano na Mazingira Mheshimiwa January Makamba (Mb) alifanya ziara Wilayani tarehe 28 na 29 mwezi Machi 2017. Katika ziara hiyo, Mheshimiwa Waziri aliweza kutembelea Eneo la Hifadhi ya Ngorongoro (NCA) katika Tarafa ya Ngorongoro na Ziwa Natron katika Tarafa ya Sale. Ziara hiyo ilikuwa na malengo yafuatayo:-

• Kukagua shughuli za uhifadhi wa Mazingira zinazotekelezwa katika Wilaya.
• Kufuatilia na kusisitiza utekelezaji wa sheria za mazingira ikiwa ni pamoja na kusaidia Wilaya katika utekelezaji wa Sheria hizo.
• Kuona ni kwa jinsi gani Wizara itakavyoweza kujenga uwezo mkubwa Zaidi katika kusimamia na kutekeleza Sheria za Mazingira kwa lengo la kusimamia Hifadhi za Mazingira.

Akiwa katika Tarafa ya Ngorongoro, Mheshimiwa Waziri alitoa maagizo yafuatayo:-

• Kuchukua hatua za haraka ili kudhibiti mimea inayohatarisha uoto wa asili katika Eneo la Hifadhi ya Ngorongoro.
• kuundwa kwa jopo la wataalamu kutoka Tume ya Sayansi na Tecknolojia, Baraza la Taifa la Hifadhi na Usimamizi wa Mazingira, Hifadhi za Taifa za Tanzania, Wizara ya Kilimo na Mifugo na Mamlaka ya Ngorongoro kufanya utafiti wa kina na wa kisayansi wa kubaini mbinu mpya za kupambana na mimea hiyo vamizi.
• kufanyika kwa ukaguzi wa kimkakati wa Mazingira utakaojumuisha Wilaya nzima ya Ngorongoro na kuitaka Mamlaka ya Hifadhi ya Ngorongoro (NCAA) kushirikiana na Baraza la Taifa la Hifadhi na Usimamizi wa Mazingira (NEMC) kutekeleza wajibu huo mapema. Ukaguzi huo wa kimkakati wa kimazingira kwa Wilaya hiyo unatazamiwa kutoa mtazamo wa hali ya mazingira kwa miaka hamsini ijayo.
• kufanyika kwa Tathmini ya Athari kwa Mazingira ama Ukaguzi wa Mazingira katika Hotel zote zilizopo eneo hilo na kulitaka Baraza la Taifa la Hifadhi na Usimamizi wa Mazingira (NEMC) kuwaadhibu kwa kuwatoza faini wahusika wote ambao hawana vyeti hivyo.

Akiwa katika Tarafa ya Sale ambalo ni eneo la Ziwa Natron, maarufu kwa mazalia ya flamingo ‘Laser Flamingo’, uwepo wa madini aina ya magadi soda, uwepo wa chemchem ya maji moto na pia ni sehemu ya miongoni mwa Milima ya volcano hai ya Oldonyo Lengai.

Mheshimiwa Waziri aliweza kukagua shughuli za utunzaji na uhifadhi wa mazingira. Mheshimiwa Waziri alipokea taarifa fupi ya shughuli za utunzaji wa mazingira iliyowasilishwa na Kaimu Mkurugenzi Mtendaji wa Wilaya Bwana Baltazary Victor Kaiza. Pamoja na mambo mengine taarifa hiyo iliainisha changamoto mbalimbali za mazingira katika Wilaya ikiwa ni pamoja na:

• Hali ya ukame
• Uvamizi wa Misitu na vyanzo vya maji.
• Uchimbaji holela wa madini
• Kukatwa kwa miti kwa ajili ya shughuli za kuchoma mikaa zisizo endelevu.

Baada ya kupokea taarifa, Mheshimiwa Waziri alipongeza jitihada kubwa zinazofanywa na Wilaya katika kuhakikisha kuwa shughuli za uhifadhi na utunzaji wa mazingira zinapewa kipaumbele kikubwa. Aidha Mheshimiwa Waziri aliweza kuzungumza na wananchi wa kijiji cha Engaresero kupitia Mkutano wa hadhara. Mheshimiwa Waziri alisisitiza shughuli za utunzaji wa mazingira na maliasili kwa ujumla na kuona uwepo wa Mpango wa serikali kuandaa mradi wa kulinda na kuhifadhi Ziwa Natron. Mradi huo utahusisha maslahi mapana ya wananchi waishio pembezoni mwa ziwa hasa kwa kutumia rasilimali zipatikanazo katika ziwa hilo.